Ýmislegt

Vinnutími

strákur

15

Komdu sæll

Svarið við spurningu þinni fer eftir því hvort þú ert að meina vinnu með grunnskóla en þá máttu vinna 12 klst. á viku eða í jólafríinu eða í sumar en þá máttu vinna 40 klst. á viku.

Í lögum um aðbúnað, hollustuhætti og öryggi á vinnustöðum nr. 46/1980 er fjallað um vinnutíma barna og unglinga og eru settar ákveðnar takmarkanir á hann. Takmarkanir miðast við virkan vinnutíma eða vinnustundir að frádregnum neysluhléum.

Almennar reglur um vinnutíma	15 ára  í skyldunámi	15–17 ára búnir að ljúka skyldunámi
Á starfstíma skóla	2 klst. á dag 12 klst. á viku	8 klst. á dag 40 klst. á viku
Utan starfstíma skóla	8 klst. á dag 40 klst. á viku	8 klst. á dag 40 klst. á viku
Vinna bönnuð	kl. 20-6	kl. 22-6
Hvíld	14 klst. á sólarhr. 2 dagar í viku	12 klst. á sólarhr. 2 dagar í viku

Í algerum undantekningartilvikum má víkja frá þessum ákvæðum og þá á sérstökum starfssviðum að því tilskildu að unglingar fái hæfilegan uppbótarhvíldartíma. Þetta á einkum við ef vinna fer fram á sjúkrastofnunum eða sambærilegum stofnunum eða um er að ræða störf á sviði landbúnaðar eða ferðamála, í hótel- og veitingarekstri og vinnu sem skipt er upp yfir daginn. Jafnframt sé starfið á sviði menningarmála, lista, íþrótta eða auglýsinga. Vinnueftirlitið hefur eftirlit með ofangreindum lögum og tekur á móti ábendingum um hugsanleg brot á þeim. 
 
Kær kveðja frá umboðsmanni barna