Þegar málið snertir einstök börn eða afmarkaða hópa

Það skiptir meginmáli að fyrir liggi upplýsingar um það hvaða réttindi barna koma til álita við meðferð tiltekins máls. Barnasáttmálinn er vegvísir á þeirri vegferð en ávallt ber að líta til meginreglna sáttmálans við matið á því sem börnum er fyrir bestu. 

Áður en ráðist er í framkvæmd mats á því sem barni er fyrir bestu, þurfa að liggja fyrir nauðsynleg gögn og upplýsingar, eins og t.d. um gangreyndar aðferðir, tölfræðileg gögn og niðurstöður rannsókna. Mikilvægt er að fram komi í gögnum málsins á hvaða gögnum og upplýsingum var byggt við framkvæmd matsins.

Taka ber tillit til sjónarmiða barna

Að tekið sé réttmætt tillit til skoðana barna á málum sem áhrif hafa á þau er grundvallarforsenda þess að unnt sé að leggja mat á það sem börnum er fyrir bestu. Samkvæmt Barnasáttmálanum eiga skoðanir barna að hafa mismikið vægi eftir aldri þeirra og þroska.

Leggja þarf sérstakt mat á það hvaða áhrif mismunandi valkostir hafa á börn og réttindi þeirra til lengri eða skemmri tíma.