Öryggisstaðlar fyrir leikvallatæki
Rólur á leikvöllum og skólalóðum eru yfirleitt útbúnar þannig að plasthólkar eru hafðir utan um keðjur eða reipi þannig að ekki er hægt að mynda lykkju.
Í verslunum er þó hægt að kaupa leiktæki með kaðlarólum sem geta valdið slysum á börnum og jafnvel dauðsföllum ef reipið nær að vefjast um háls barns. Mismunandi merkingar eru á þessum tækjum eftir því hvort notkun þeirra er heimil á leikvöllum og sameignalóðum eða einungis í einkagörðum. Kaðlarólur eru þrátt fyrir það jafnhættulegar hvar sem þær eru staðsettar.
Neytendastofa, Embætti landlæknis og umboðsmaður barna hafa nú farið fram á að evrópskum öryggisstöðlum um slíkar rólur verði breytt þannig að skylt verði að setja sérstaka hólka úr plasti utan um kaðla og keðjur í rólum þannig að ekki sé mögulegt að gera lykkju á reipið eða keðjuna.
Umboðsmaður barna hefur því sent bréf til General Product Safety Directive nefndarinnar í Brussel sem sér um öryggisstaðla á vegum Evrópusambandsins. Í dag, mánudag, mun forstjóri Neytendastofu sem sæti á í nefndinni fylgja málinu eftir í Brussel.
Frumkvæðið að þessu verkefni kemur frá aðstandendum fjögurra ára drengs sem lést þegar hann flæktist í kaðlarólu árið 2010.