Einblöðungur um skólaráð - Bréf til grunnskóla
Umboðsmaður barna hefur sent öllum grunnskólum tölvubréf til að kynna einblöðung um þátttöku nemenda í skólaráði sem gefinn var út fyrr í vetur. Í bréfinu segir:
Umboðsmaður barna vill vekja athygli á einblöðungi um skólaráð sem embættið gaf út í vetur. Einblöðungurinn er sérstaklega ætlaður nemendum grunnskóla og hefur að geyma upplýsingar úr grunnskólalögum og reglugerð um skólaráð ásamt nokkrum hagnýtum atriðum fyrir þá sem hafa áhuga á að starfa í skólaráði. Opna einblöðung umboðsmanns barna um skólaráð (PDF)
Í könnun um skólaráð sem umboðsmaður barna lét gera í fyrra kom fram að meirihluti skólastjórnenda töldu þörf á fræðslu til nemenda vegna setu þeirra í skólaráðum. Töluðu þá flestir um að fræða þyrfti nemendur um hlutverk þeirra og skyldur í skólaráðum en einnig um fundarsköp og aðkomu barnanna að fundum. Þar sem ákvæði um skólaráð kom fyrst inn í grunnskólalög sumarið 2008 eru margir óvissir um hvernig fara á að vegna aðkomu nemenda að skólaráðum.
Einblöðungurinn er aðeins gefinn út á netinu og vonast umboðsmaður til þess að starfsfólk grunnskólanna prenti hann út fyrir nemendur eða kynni innihald hans á annan hátt, sérstaklega fyrir þeim fulltrúum nemenda sem nú sitja í skólaráði. Einblöðungurinn er stuttur og hnitmiðaður en það er gert samkvæmt ósk ráðgjafarhóps umboðsmanns barna.
Í framhaldinu er ætlunin að safna upplýsingum frá skólum um starf nemenda í skólaráði og birta á vef umboðsmanns barna þannig að nemendur og skólar geti lært af því sem vel er gert í öðrum skólum. Ef þinn skóli getur nefnt dæmi um vel heppnaða tillögu eða málsmeðferð fulltrúa nemenda í skólaráði eða sagt frá því hvernig þið teljið heppilegast að tryggja lýðræðisleg vinnubrögð þá eru allar ábendingar vel þegnar.
Kær kveðja,
Margrét María Sigurðardóttir,
umboðsmaður barna